A diversidade lingüística no mundo

Que sabes?

Cantas linguas hai no mundo?
Están todas nas mesmas condicións? Teñen todas a mesma saúde?
Por que se di que algunhas linguas poden desaparecer? No mundo tan tecnolóxico que temos pode acontecer isto?
Por que unhas linguas son tan parecidas entre si e outras presentan diferenzas tan grandes entre elas?

Despois de lermos os seguintes apartados poderemos responder a estas pregunta e, seguramente, a outras que nos vaian xurdindo.

A diversidade lingüística

É difícil determinar con exactitude o número de linguas existentes no mundo. 3 000? 5 000? 10 000? Por que non se poñen de acordo os estudosos da materia?

As razóns da dificultade de cuantificar a diversidade lingüística son variadas:

Non existe un "censo oficial" das linguas do mundo. Podemos atopar estudos máis ou menos científicos, máis ou menos rigorosos, máis ou menos documentados... pero é case imposible dar un deles por autenticamente definitivo. Citaremos, porén, Ethnologue, unha páxina web con abondosa e contrastada información.

www.ethnologue.com, Dominio Público

Non todos os estudosos coinciden na definición e concepción do que é unha lingua.
Aínda hoxe en día se descobren novos lugares e novas comunidades lingüísticas, como en África Central ou na Amazonia.
Moitas linguas teñen un número de falantes tan minoritario que están a piques de despareceren por falta de falantes novos.
A presión das denominadas linguas internacionais é tan forte que está facendo retroceder e mesmo desaparecer moitas linguas.

Fíxate

Le o seguinte fragmento e reflexiona:

Retroalimentación

Por raro que pareza, non sabemos cantas linguas se falan hoxe no mundo. Isto debe resultar cando menos sorprendente a quen traballa noutros eidos. Os compendios e atlas lingüísticos oscilan entre as 3.500 as 12.000 linguas, unha marxe de imprecisión intolerábel, por exemplo, para un biólogo capaz de organizar taxonomías de millóns de especies.

Para comprendermos as causas desta amplísima variación temos que considerar os múltiplos problemas que enfrontan as investigacións que procuran información precisa a este respecto, e tamén as razóns lingüísticas, históricas e culturais que nos impiden responder de xeito simple á pregunta de qué se pode considerar unha lingua. Ao procurarmos estas causas, decatarémonos de que un dos principais problemas con que se atopa a humanidade nos albores do século XXI é a morte de linguas, que debe ser entendida no sentido lato de perda dos códigos e tamén de perda de diversidade cultural.

Non podemos saber cantas linguas se falan no mundo porque aínda hoxe continúan a descubrirse novas linguas nas rexións inexploradas, en especial no Amazonas, en Áfica Central e en Nova Guinea Papúa. Aínda que non queden zonas salvaxes completamente descoñecidas, unha cousa é dispormos do mapa dun territorio que se pode ver desde o aire ou desde un satélite, e outra sabermos se está ou non habitado, se son un ou varios os pobos que o ocupan ou se cada un deses pobos fala unha ou varias linguas.

Teresa Moure, Ecolingüística. Entre a ciencia e a ética, Universidade da Coruña, 2011, p. 30

As linguas no mundo segundo Ethnologue

Fíxate nos mapas anteriores. Ethnologue cataloga 7102 linguas no mundo e non todas elas teñen a mesma condición ou estatus.

Fíxate que distingue linguas institucionais, en desenvolvemento, vigorosas, en apuros e moribundas.

Licenciado baixo a Licenza Creative Commons Recoñecemento Compartir igual 4.0

« Anterior | Seguinte »